إلى المدعوة مروة مؤسسة حركة مبارك أمان مصر والتي قالت بصوت جليل ملئه الرهبة المنبعثة من سمو رسالتها في نهاية برنامج العاشرة مساءاً قناة دريم 2 يوم الاثنين : "يا جماعة ما تتاجروش بآلام المصريين، الشعب المصري يعرف يتكيف كويس".
أقولك إيه؟
روحتى حي عشوائي قبل كدة عشان تشوفي التكيف اللي بتقولي عليه؟
تكيف ما بعده كده ورضا من هنا لخمسمائة سنة جاية...
رضا العائلات إنها تعيش في أوضة واحدة وحمام مشترك مع الجيران.
عيالهم الرضع يناموا جنب الفراخ والقطط.
إنه يهجم عليهم واحد حشاش بالليل يهددهم بالسرقة والاغتصاب...
إن "قمر" – طفلة في ابتدائي- ترضى بحالها لما يغتصبها ولد أكبر منها في المدرسة ويربطها بحبال.
وإن أمل – طفلة في ابتدائي- ترضى يجيلها فشل كلوي من مية مصر ولما تروح تعمل غسيل يجيلها ايدز من الجهاز.
وإن مريم – في إعدادي منازل- تدور على كتب تذاكر منها ومش لاقية...
وإن عيال كتير من الحي ما يعرفوش إن فيه دنيا براه والدنيا دي نفسها ما تعرفش بيهم ولا حتى على الورق عشان ساقطين قيد.
وإن أغلب السكان فوق دماغهم سقف حديد هش، لما تنزل المطرة في الشتا في عز اليل وإحنا نايمين فوقينا سقف أسمنت مسلح حديد عز مفتخر وبطاطين ولحفة صيني معتبرة هما بيغرقوا في أوضتهم الحيلة لما تملاها المية.
وإن في الوقت اللي أبراج الضغط العالي بتوصل لنا كهرباء نفتح بيها التكيفات والقنوات الفضائية وكل ما يحلو لنا، هما عايشين تحت برج من الأبراج دي وما بالك الأمراض اللي بتعمله فيهم. كفاية يوم واحد تعيشيه هناك عشان ترجعي البيت عاوزة تنامي من زنة الأبراج دي في دماغك في الوقت اللي هم عايشين في الزنة دي ليل نهار.
والله الشعب عمل اللي عليه وزيادة اتكيف 30 سنة وتعاون مع الحكومة كتير برضاه على حاله...
لو التكيف معناه إن الناس تفقد آدميتها وكرامتها وتتنازل عن أبسط حقوقها وتأخذ على قفاها ليل نهار يبقى ده كفر مش تكيف...
لو ده هو الأمان اللي بتتكلمي عنه يبقى إيه هو الخطر؟
ليست هناك تعليقات:
إرسال تعليق